Home Blog

அதிபர்-ஆசிரியர்களின் சம்பள முரண்பாட்டிற்கு தீர்வு கிடைக்கும் வரை தொடர் போராட்டம்..!

ஆசிரியர்-அதிபர் சேவையில் நிலவும் பிரச்சினைகளுக்கு தீர்வு கிடைக்கும் வரை தொடர் சத்தியாக் கிரக போராட்டத்தில் ஈடுப்படுவோம். எமது அமைதி வழி போராட்டத்தை முடக்க அரசாங்கம் சர்வாதிகாரமாக செயற்படுவது வன்மையாக கண்டிக்கத்தக்கது.

முன்வைக்கப்பட்டுள்ள கோரிக்கைகளுக்கு தீர்வு கிடைக்கும் வரை சத்தியாக்கிரக போராட்டம் தொடரும் என அகில இலங்கை அதிபர் சேவை தொழிற் சங்கத்தின் தலைவர் வண. உலபனே சுமங்கல தேரர் தெரிவித்தார்.


கொழும்பு காலி முகத்திடலின் முன்பாக ஆர்ப்பாட்டத்திற்காக ஒதுக்கப்பட்டுள்ள இடத்தில் சத்தியாக் கிரக போராட்டத்தில் ஈடுப்பட்டதை தொடர்ந்து ஊடகங்களுக்கு கருத்து தெரிவிக்கையில் மேற்கண்டவாறு குறிப்பிட்டார்.

அவர் மேலும் குறிப்பிடுகையில்,

நியாயமான கோரிக்கைகளை முன்வைத்து அதிபர்-ஆசிரியர் தொழிற் சங்கத்தினர் போராட்டத்தில் ஈடுப்படுகிறார்கள்.

தற்போதைய போராட்டத்திற்கு இதுவரையில் ஆட்சியில் இருந்த அனைத்து அரசாங்கங்களும் பொறுப்பு கூறவேண்டும். 24 வருட காலமாக தீர்க்கப்படாத சம்பள பிரச்சினைக்கு தற்போது தீர்வு பெற்றுக் கொள்ள உறுதியாகவுள்ளோம்.


முன்வைக்கப்பட்ட கோரிக்கைகளுக்கு தீர்வுகோரி அதிபர்-ஆசிரியர் தொழிற் சங்கத்தினர் நேற்று காலி முகத்திடம் முன்பாக போராட்டத்திற்கு என ஒதுக்கப்பட்டுள்ள இடத்தில் கூடாரமிட்டு சத்தியாகிரக போராட்டத்தில் ஈடுப்பட்டார்கள்.

அமைதி வழி போராட்டத்தில் ஈடுப்பட்டவர்கள் மீது கொழும்பு –கோட்டை பொலிஸ் நிலைய அதிகாரிகள் சர்வாதிகாரமான முறையில் தாக்குதலில் ஈடுப்பட்டார்கள். கூடாரங்களை உடைத்து கீழத்தரமான முறையில் செயற்பட்டார்கள்.


இவ்வாறான செயற்பாடுகள் வன்மையாக கண்டிக்கத்தக்கவை. எமது சத்தியாக்கிரக போராட்டம் வெற்றிகரமான முறையில் முன்னெடுத்து செல்லப்படும்.

முன்வைக்கப்பட்டுள்ள கோரிக்கைகளுக்கு தீர்வு வழங்கும் வகையில் தொழிற்சங்கத்தினருடன் பேச்சுவார்த்தையில் ஈடுப்பட ஜனாதிபதி மற்றும் நிதியமைச்சர் இதுவரை வாய்ப்பு வழங்கவில்லை. ஆகவே பிரச்சினைகளுக்கு தீர்வு கிடைக்கும் வரை சத்தியாக்கிரக போராட்டம் தொடரும் என்றார்.

மக்களுக்கு கட்டாய கொரோனா தடுப்பூசி வழங்கும் திட்டம் தொடர்பில் அரசாங்கம் ஆராய்ந்து வருகிறது..!

இலங்கையில் இதுவரை கொரோனா தடுப்பூசியை பெற்றுக் கொள்ளாத மக்களுக்கு கட்டாய கொரோனா தடுப்பூசி வழங்கும் திட்டம் தொடர்பில் அரசாங்கம் ஆராய்ந்து வருவதாக சுகாதார அமைச்சர் கெஹலிய ரம்புக்வெல தெரிவித்துள்ளார்.

கொழும்பில் இன்றைய தினம் இடம்பெற்ற ஊடக சந்திப்பில் கருத்து வெளியிட்ட அவர், தடுப்பூசி பெறாதவர்களினால் ஏனையவர்களுக்கு ஏற்படும் பிரச்சினைகள் தொடர்பில் ஆராய்வதாக கூறினார்.


இதன் போது மேலும் கருத்துரைத்த அவர்,

கொரோனா தடுப்பூசியினைப் பெற்றுக் கொள்ளுமாறு பிரஜைகளைக் கட்டாயப்படு்த்த முடியாது ஆனால், தடுப்பூசி பெறாதவர்களினால் ஏனையவர்களுக்குப் பிரச்சனை ஏற்படும் என்றால் அது தொடர்பில் உரிய நடவடிக்கை எடுக்கப்பட வேண்டும்.

நாட்டில் பெரும்பான்மையானவர்கள் தடுப்பூசியினைப் பெற்றுள்ள நிலையில், ஏனையவர்கள் தொடர்பில் ஆராயப்பட்டு வருகின்றது.


இவர்களுக்கான தடுப்பூசித் திட்டம் குறித்து சட்ட ஏற்பாடுகள் கொண்டு வரப்பட்டு இந்த வேலைத் திட்டம் முன்னெடுக்கப்பட வேண்டும் என்பது எனது தனிப்பட்ட நிலைப்பாடு.

எதிர்வரும் நவம்பர் மாதம் மூன்றாவது தடுப்பூசி வழங்கப்படவுள்ளது. ஏனைய நாடுகளில் மூன்றாவது தடுப்பூசிக்கு பணம் அறவிடப்படும் நிலையில் நாம் மக்களுக்கு இலவசமாக வழங்கவுள்ளோம்.


ஆசிரியர்கள் மற்றும் அதிபர்களின் பிரச்சனைகள் தீர்க்கப்பட வேண்டும் என்பதை ஏற்றுக் கொள்கிறோம். அதற்கு முன் நாட்டில் வீழ்ச்சியடைந்துள்ள கல்வியினை கட்டியெழுப்ப ஆசிரியர்கள் பங்களிப்பு வழங்கப்பட வேண்டும் என்றார்.

வெளிநாடுகளுக்கு செல்லும் மாணவர்களின் எண்ணிக்கை மூன்று மடங்காக அதிகரிப்பு..!

என்றும் இல்லாத வகையில் வெளிநாடுகளுக்கு செல்லும் மாணவர்களின் எண்ணிக்கை அதிகரித்துள்ளதாக பரீட்சைகள் திணைக்களம் தெரிவித்துள்ளது.

இதன்படி வெளிநாடு செல்லும் மாணவர்களின் எண்ணிக்கை மூன்று மடங்காக அதிகரித்துள்ளதாக தெரிவிக்கப்படுகிறது.


முன்னர் வெளிநாடு செல்வதற்கு தினசரி விண்ணப்பிக்கும் மாணவர்களின் எண்ணிக்கை 350 ஆகக் காணப்பட்டது.

எனினும் தற்போது அவ்வாறு விண்ணப்பிக்கும் மாணவர்களின் எண்ணிக்கை ஆயிரத்தைக் கடந்துள்ளதாகப் பரீட்சைகள் திணைக்களம் தெரிவித்துள்ளது.

காய்ச்சல் உள்ளிட்ட நோய் அறிகுறி காணப்பட்டால் மாணவர்களை பாடசாலைக்கு அனுப்ப வேண்டாம்..!

பாடசாலைக்கு செல்வதற்காக வீட்டிலிருந்து வெளியேறும் சந்தர்ப்பத்திலிருந்து, மீண்டும் வீட்டுக்குச் செல்லும் வரையும் , பொது போக்குவரத்து என்பவற்றை பயன்படுத்தும் சந்தர்ப்பங்களிலும் சமூக இடைவெளி உள்ளிட்ட சுகாதார வழிகாட்டல்களை முறையாக பின்பற்றுமாறு வலியுறுத்துகின்றோம்.

இவ்வாறான வழிமுறைகளைப் பின்பற்றுவதன் மூலம் பாடசாலை ஊடாக கொவிட் பரவுவதைத் தவிர்க்க முடியும் என்று பிரதி சுகாதார சேவைகள் பணிப்பாளர் நாயகம் விசேட வைத்திய நிபுணர் ஹேமந்த ஹேரத் தெரிவித்தார்.


கொழும்பில் திங்கட்கிழமை (25) நடைபெற்ற ஊடகவியலாளர் சந்திப்பில் இதனைத் தெரிவித்தார்.

அவர் மேலும் தெரிவிக்கையில் ,

பாடசாலைக்கு செல்வதற்காக வீட்டிலிருந்து வெளியேறும் சந்தர்ப்பத்திலிருந்து , மீண்டும் வீட்டுக்குச் செல்லும் வரையும் , பொது போக்குவரத்து என்பவற்றை பயன்படுத்தும் சந்தர்ப்பங்களிலும் சமூக இடைவெளி உள்ளிட்ட சுகாதார வழிகாட்டல்களை முறையாக பின்பற்றுமாறு வலியுறுத்துகின்றோம்.

மாணவர்கள் உபயோகிக்கக் கூடிய தரத்தில் உயர்ந்த ஒரு சந்தர்ப்பத்திற்கும் அதிகமாக பயன்படுத்தக் கூடிய முகக் கவசங்களை வழங்குமாறு பரிந்துரைக்கின்றோம்.


மாணவர்களுக்கு காய்ச்சல் உள்ளிட்ட ஏதேனுமொரு நோய் அறிகுறி காணப்படுமாயின் அது குணமடையும் வரை அவர்களை பாடசாலைக்கு அனுப்ப வேண்டாம் என்று பெற்றோரிடம் கேட்டுக் கொள்கின்றோம். இவ்வாறான செயற்பாடுகள் மூலம் பாடசாலை ஊடாக கொவிட் பரவுவதைத் தவிர்க்க முடியும்.


தடுப்பூசியைப் பெற்றுக் கொள்வதற்கான தகுதி இருந்தும் , இதுவரையில் தடுப்பூசியைப் பெற்றுக் கொள்ளாதவர்கள் இருந்தால் அவர்களை துரிதமாக தடுப்பூசியைப் பெற்றுக் கொள்ளுமாறு வலியுறுத்துகின்றோம். இவ்வாறு தடுப்பூசியைப் பெறாதவர்கள் எந்த வயது பிரிவினராகக் காணப்பட்டாலும் அவர்கள் ஆபத்துடையவர்களாகவே கருதப்படுவர் என்றார்.

சிறுவர் பாதுகாப்பு அதிகார சபையின் தலைவர் இராஜினாமா; சுகாதார அமைச்சருக்கும் மாற்றம்???

தேசிய சிறுவர் பாதுகாப்பு அதிகார சபையின் தலைவர் பேராசிரியர் முதித விதானபத்திரன தனது பதவியை இராஜினாமா செய்துள்ளார். அவரின் பதவி விலகலுக்கான காரணம் இதுவரை வெளியாகவில்லை என்பது குறிப்பிடத்தக்கது.


அதேபோல், இலங்கை மருந்தகக் கூட்டுத்தாபனத்தின் தலைவர் பதவியிலிருந்து விலகவிருந்த மருத்துவர் பிரசன்ன குணசேனவின் பதவி விலகலை அரச தலைவர் கோட்டாபய ராஜபக்ஷ தடுத்திருப்பதாக தெரிவிக்கப்படுகின்றது.


மருத்துவர் பிரசன்ன, சுகாதார அமைச்சர் கெஹலிய ரம்புக்வெலவுடன் ஏற்பட்ட மோதல் காரணமாகவே பதவி விலக முடிவு செய்தார்.

இந்நிலையில் சுகாதார அமைச்சர் கெஹலிய அப்பதவியிலிருந்து பதவி விலகலாம் அல்லது மாற்றப்படலாம் என்ற நிலைமை கூட வரலாம் என்று தகவல்கள் வெளியாகியுள்ளன.

ஊதியம் கோரி ரூபவாஹினிக் கூட்டுத்தாபன ஊழியர்கள் ஆர்ப்பாட்டம்..!

இலங்கை ரூபவாஹினிக் கூட்டுத்தாபனத்தின் ஊழியர்கள் நேற்று (25) நிறுவன தலைவரின் அறையை முற்றுகையிட்டுள்ளதாக தகவல்கள் வெளியாகியுள்ளன.

இந்த மாதத்திற்கான சம்பளம் இதுவரையில் வழங்கப்படாமையால் அங்கு ஊழியர்கள் கோஷங்களை எழுப்பியவாறு ஆர்ப்பாட்டங்களில் ஈடுபட்டுள்ளதாக அறியமுடிகிறது.


மேலும், மேலதிக கொடுப்பனவு உள்ளிட்ட ஊழியர்களுக்கு வழங்கப்பட்டு வந்த அனைத்து கொடுப்பனவுகளையும் இடை நிறுத்தியுள்ளதாக நிறுவன முகாமைத்துவம் அறிவித்துள்ளதாக தெரிவிக்கப்படுகிறது.


ஆசிரியர்களின் சம்பள பிரச்சினைக்கு அரசாங்கம் இதுவரையில் தீர்வு வழங்காததன் பின்னணியில் தற்போது அரச ஊடகமொன்றில் பணியாற்றும் ஊழியர்களின் சம்பளத்திலும் அரசு கை வைத்துள்ளதாக போராட்டத்தில் ஈடுபட்ட ஊழியரொருவர் தெரிவித்தார்.

கிளிநொச்சி வடக்கு கல்வி வலயத்தின் ஆசிரியர்கள் கவனயீர்ப்பு போராட்டத்தில்..!

கிளிநொச்சி வடக்கு கல்வி வலயத்தின் பளைக்கல்வி கோட்டத்திற்கு உட்பட்ட அதிபர்,ஆசிரியர்கள் பாடசாலை நிறைவடைந்ததும் பளை கல்விக் கோட்டத்திற்கு முன்பாக கவனயீர்ப்பு போராட்டத்தில் பிற்பகல் 2.00மணிக்கு ஈடுபட்டனர்


கறுப்பு கொடிகளை ஏந்தியவாறும் பதாகைகளை ஏந்தியவாறு கோஷங்களை எழுப்பியவாறு கவனயீர்ப்பு போராட்டத்தை முன்னெடுத்தனர்.


நாம் 5000ரூபாவுக்கு அடி பணியமாட்டோம், ஆசிரியர் சேவையை கொச்சைப் படுத்தாதே, கல்விக்கு 6% ஐ ஒதுக்கு, இலவசக் கல்வியை சீரழிக்காதே போன்ற வாசகங்களை ஏந்தியவாறு குறித்த கவனயீர்ப்பு போராட்டத்தில் ஈடுபட்டனர் என்பதும் குறிப்பிடத்தக்கது.

அதிபர்-ஆசிரியர்கள் சம்பள அதிகரிப்பிற்காக போராடுவதில் தவறென்ன???

வாழ்க்கைச் செலவுகள் அதிகரித்துள்ள நிலையில் ஆசிரியர்-அதிபர்கள் சம்பள அதிகரிப்பிற்காக போராடுவதில் தவறென்ன உள்ளது. தொழிற்சங்க நடடிக்கைகளுடன் பாடசாலைக்கு சமுகமளித்து சட்டப்படி கடமையில் ஈடுபடுகிறோம்.

ஆசிரியர்-அதிபர் சேவையில் 24 வருடகாலமாக நிலவும் பிரச்சினைக்கு தீர்வு காணும் நோக்கம் அரசாங்கத்திற்கு கிடையாது.


பாடசாலைகளை தொடர்ந்து திறப்பதா? அல்லது தொடர்ந்து மூடுவதா? என்பதை அரசாங்கம் தீர்மானிக்க வேண்டும் என ஆசிரியர் – அதிபர் சேவை சங்கத்தின் செயலாளர் மஹிந்த ஜயசிங்க தெரிவித்தார்.

ஆசிரியர் – அதிபர் தொழிற்சங்கத்தினர் சம்பள பிரச்சினை கோரிக்கையை முன்வைத்து இன்று கோட்டை புகையிரத நிலையத்தின் முன்பாக இடம் பெற்ற போராட்டத்தில் கலந்து கொண்டு கருத்துரைக்கையில் மேற்கண்டவாறு குறிப்பிட்டார்.

அவர் மேலும் குறிப்பிடுகையில்,

ஆசிரியர் – அதிபர் தொழிற் சங்கத்தினர் வீதிக்கிறங்கி போராடுவதன் பொறுப்பை அரசாங்கமும், கல்வி சேவை அதிகாரிகளும் ஏற்க வேண்டும். முன்வைக்கப்பட்ட கோரிக்கைகளுக்கு தீர்வை வழங்காமல் பாடசாலைகளை முதற்கட்டமாக திறக்க வேண்டாம் என அரசாங்கத்திடம் வலியுறுத்தினோம்.

அரசாங்கம் பலவந்தமான முறையில் பாடசாலைகளை திறந்தது. கடந்த 21 மற்றும் 22 ஆம் திகதிகளில் போராட்டத்தில் ஈடுப்படும் தொழிற் சங்கத்தினரும் ,மாணவர்களும் பாடசாலைகளுக்கு சமுகமளிக்கவில்லை.


எமது போராட்டம் 98 சதவீதம் வெற்றி பெற்றுள்ளது. அரசாங்கத்தின் உத்தரவிற்கு அமைய ஆசிரியர்கள் கடமைக்கு சமுகமளிக்கவில்லை.

தொழிற்சங்கத்தினரது ஆலோசனைகளுக்கும், மாணவர்களின் நலனையும் கருத்திற் கொண்டு பாடசாலைகளுக்கு சமுகமளித்துள்ளோம்.

ஆசிரியர் – அதிபர் தொழிற்சங்கத்தினரது போராட்டத்தை முடிவிற்குக் கொண்டு வரும் நோக்கம் அரசாங்கத்திற்கு கிடையாது. நிதியமைச்சர், ஜனாதிபதி ஆகியோர் தொழிற்சங்கத்தினருடன் பேச்சுவார்த்தையில் ஈடுப்பட அனுமதி வழங்கவில்லை.


அரசாங்கத்தின் சர்வாதிகார செயற்பாடுகளினால் அனைத்து சேவை துறையினரும் வீதிக் கிறங்கியுள்ளார்கள். தவறான பொருளாதார முகாமைத்துவத்தினால் வாழ்க்கை செலவுகள் அதிகரிக்கப்பட்டுள்ளன.

சுபோதினி குழு அறிக்கையின் பிரகாரம் ஆசிரியர் – அதிபர் சேவையில் நிலவும் சம்பள பிரச்சினைகளுக்கு வரவு-செலவுத் திட்டத்திற்கு அமைய தீர்வுப் பெற்றுக்கொடுக்க வேண்டும். மாணவர்களின் நலனை கருத்திற்கொண்டு கல்வி செயற்பாடுகளில் மாத்திரம் ஈடுப்படுவோம்.


முன்வைக்கப்பட்டுள்ள கோரிக்கைகளுக்கு தீர்வு கிடைக்கும் வரை போராட்டத்தில் ஈடுப்படுவோம். தொழிற்சங்க போராட்டத்தை கைவிடவில்லை. தொழிற்சங்க போராட்டத்துடன் சட்டப்படி சேவையில் ஈடுப்பட்டுள்ளோம்.

பொருளாதாரத்தை கேள்விக்குள்ளாக்கிய நிதியமைச்சர் பஷில் ராஜபக்ஷ ஆசிரியர்-அதிபர் தொழிற்சங்கத்தினரது கோரிக்கைகளுக்கு தீர்வு காண எவ்வித நடவடிக்கைகளையும் முன்னெடுக்கவில்லை. போராட்டத்தின் ஊடாக தீர்வை பெற்றுக் கொள்வோம் என்றார்.

எந்த நேரத்திலும் தேர்தலை சந்திக்க தயார்; அமைச்சர் நாமல் ராஜபக்ஷ தெரிவிப்பு..!

அரசாங்கம் எந்த நேரத்திலும் தேர்தலை சந்திக்க தயாராக இருப்பதாக விளையாட்டு துறை அமைச்சர் நாமல் ராஜபக்ஷ தெரிவித்துள்ளார்.

எங்கள் ஆணையை புதுப்பிக்க பொதுமக்கள் முன் செல்ல தயங்க மாட்டேன் எனவும் தேர்தல் தாமதங்கள் தொடர்பாக முந்தைய நிர்வாகத்துடன் போராடியதாகவும் அவர் தெரிவித்துள்ளார்.


வாக்காளர்கள் அரசாங்கங்களைத் தேர்ந்தெடுக்கிறார்கள் என்பதால், ஆணையைப் புதுப்பிக்க அவர்களுக்கு அவ்வப்போது வாய்ப்பு வழங்கப்பட வேண்டும் என்றும் அமைச்சர் குறிப்பிட்டுள்ளார்.

சரியான நேரத்தில் தேர்தலை நடத்துவார்கள் என்று அவர்கள் நம்புகிறார்கள் எனவும் அவர் கூறியுள்ளார்.


தேர்தல்களை நடத்துவதற்கு தாம் தற்போது கலந்துரையாடல்களை நடத்தவில்லை. ஆனால் மக்களுக்கு சலுகைகளை வழங்குவதற்காகவே பணியாற்றி வருவதாக அமைச்சர் நாமல் ராஜபக்ச கூறினார்.


வரவு செலவுத் திட்டத்தின் மூலம் கிராமப்புற பொது மக்களுக்கு நிதி ஒதுக்கீடு செய்துள்ளதாகவும், குறித்த நிதி அவர்களுக்கு உரிய முறையில் சென்றடைவதை உறுதி செய்ய வேண்டும் என்றும் அமைச்சர் நாமல் ராஜபக்ஷ மேலும் தெரிவித்தார்.

முஸ்லீம்களின் தூதுவர் நபிகள் குறித்து கருத்து; பெண் தலைமை ஆசிரியருக்கு மரண தண்டனை..!

பாகிஸ்தானின் தெய்வ நிந்தனை சட்டங்கள் காலனி ஆதிக்க காலத்து சட்டங்களாகும். கடுமையான இச்சட்டங்கள் நீண்ட காலமாகவே சர்ச்சைக்குரியதாக விளங்கி வருகின்றன.

நபிகள் நாயகம் கடைசி இறைத்தூதர் கிடையாது எனக் கூறிய பெண் தலைமையாசிரியர் ஒருவருக்கு தெய்வ நிந்தனை வழக்கில் மரண தண்டனை விதித்து பாகிஸ்தான் நீதிமன்றம் பரபரப்பு தீர்ப்பு கூறியுள்ளது.

பாகிஸ்தானின் லாகூர் நகரில் உள்ள தனியார் பள்ளியின் தலைமை ஆசிரியாக பணியாற்றி வந்தவர் தன்வீர். இவர் தெய்வ நிந்தனையில் ஈடுபட்டதாக, உள்ளூர் மதத் தலைவர் ஒருவர் கடந்த 2013ம் ஆண்டு காவல் நிலையத்தில் புகார் அளித்தார்.


அப்புகாரில் நபிகள் நாயகம் கடைசி இறைத்தூதர் கிடையாது எனவும் நான் தான் கடைசி இறைத்தூதர் எனவும் தன்வீர் பிரகடனம் செய்ததாக குற்றம் சுமத்தியிருந்தார்.

இந்த வழக்கின் விசாரணையின் போது தன்வீருக்காக ஆஜரான வழக்கறிஞர் முகமது ரம்ஜான், வாதாடுகையில் தனது வாதியான தன்வீர் மனநிலை சரியில்லாதவர் எனவும், நீதிமன்றம் இதனை பரிசீலிக்க வேண்டும் எனவும் தெரிவித்திருந்தார்.

ஆனால் அரசுத் தரப்பில் ஆஜரான வழக்கறிஞர், பஞ்சாப் மனநல மருத்துவக் கல்வி மையத்தின் அறிக்கையை சுட்டிக்காட்டி, தன்வீர் மனநிலை சரியாகத் தான் இருப்பதாக கூறினர்.


தற்போது இந்த வழக்கில் தீர்ப்பு வழங்கப்பட்டுள்ளது. கூடுதல் மாவட்ட செசன்ஸ் நீதிபதி மன்சூர் அகமது அளித்த தீர்ப்பில், தன்வீர் தெய்வ நிந்தனையில் ஈடுபட்டது ஊர்ஜிதமாகி இருக்கிறது. நபிகள் நாயகம் குறித்து அவதூறாக பேசியிருக்கிறார்.

எனவே பெண் தலைமையாசிரியரான தன்வீருக்கு மரண தண்டனையும், 5,000 ரூபாய் அபராதமும் விதிக்கப்படுவதாக தீர்ப்பளித்துள்ளார்.

பாகிஸ்தானின் தெய்வ நிந்தனை சட்டங்கள் காலனி ஆதிக்க காலத்து சட்டங்களாகும். கடுமையான இச்சட்டங்கள் நீண்ட காலமாகவே சர்ச்சைக்குரியதாக விளங்கி வருகின்றன. 1987ம் ஆண்டு முதல் இதுவரை 1,472 பேர் தெய்வ நிந்தனை வழக்குகளில் குற்றம்சாட்டப்பட்டுள்ளனர்.


மேலும் இது போன்ற மிகவும் சீரியசான விவகாரங்களில் குறிப்பாக தெய்வ நிந்தனை வழக்குகளில் குற்றம்சுமத்தப்பட்டவர்களுக்காக ஆஜராவதை வழக்கறிஞர்கள் தவிர்த்த் வருகின்றனர்.

2010ம் ஆண்டு தெய்வ நிந்தனை வழக்கு ஒன்று அப்போது தலைப்புச் செய்திகளில் வந்தன. ஆசியா பிபி என்று பரவலாக அறியப்படும் ஆசிய நூரின் என்ற பாகிஸ்தானின் கிறிஸ்துவ பெண்மணி ஒருவர்,

பெண்கள் சிலருடன் பேசும்போது முகமது நபி குறித்து அவமதிப்பாக பேசியதாக அவர் மீது தெய்வ நிந்தனை வழக்கு தொடுக்கப்பட்டது. சுமார் 10 ஆண்டுகளுக்கு பின்னர் 2018ம் ஆண்டு போதிய ஆதாரங்கள் இல்லை எனக்கூறி உச்சநீதிமன்றம் அவரை விடுதலை செய்தது.


இருப்பினும் மறுசீராய்வு தீர்ப்பு வரும் வரையிலும் நாட்டை விட்டு வெளியேறக் கூடாது என உத்தரவிடப்பட்டது. ஆசியா பிபி தற்போது கனடாவில் ஒரு மறைவான இருப்பிடத்தில் வாழ்ந்து வருகிறார்.

விளம்பரங்கள்




அண்மைய செய்திகள்

அதிகமாக வாசிக்கபட்டவை