ரிஷாட்டுக்கு எதிரான பிரச்சார மேடையாகிய வவுனியா அபிவிருத்திக் குழுக் கூட்டம்..!

0

வயிற்றில் இருக்கும் பிள்ளைக்கும் ரிஷாட் பதியுதீன் வீடுகளை வழங்கியிருந்தார் என வவுனியா மாவட்ட ஒருங்கிணைப்பு குழுத் தலைவர் தர்மபால செனவிரத்தின தெரிவித்தார்.

வவுனியா மாவட்ட செயலகத்தில் புதிய அரசின் முதலாவது ஒருங்கிணைப்புக் குழு கூட்டம் இன்று 17.12 ஒருங்கிணைப்பு குழுவின் தலைவர் தர்மபால செனவிரத்தின தலைமையில் இடம்பெற்ற போதே அவர் தனது ஆரம்ப உரையில் இவ்வாறு தெரிவித்தார்.

தொடர்ந்தும் கருத்து தெரிவித்த அவர்,

கடந்த காலத்தில் அரசாங்கம் இருந்தா? இல்லையா? என்பது தெரியவில்லை. அவ்வாறான நிலையிலேயே பல செயற்பாடுகள் இடம் பெற்றது.

ரிசாட் பதியுர்தீன் முஸ்லீம்கள் மட்டுமே இங்கு இருப்பதாக நினைத்து பல வேலைத் திட்டங்களை செயற்படுத்தியிருந்தார். எனினும் நாம் அவ்வாறு செய்யப் போவதில்லை. இங்கு வாழும் மூவின மக்களுக்கும் சமமாக வளங்கள் பிரிக்கப்பட்டு கொடுக்கப்படும்.

தமிழ், சிங்கள, முஸ்லீம் மக்கள் அனைவருக்கும் ஒரே மாதிரியான செயற்பாட்டை முன்னெடுக்குமாறு ஜனாதிபதி கோட்டபாயவும் தெரிவித்துள்ளார்.

கடந்த ஆட்சியில் செய்யப்பட்ட பல வேலைத்திட்டங்கள் இடை நடுவில் கைவிடப்பட்டுள்ளது. சிவமோகன் மற்றும் சிவசக்தி ஆனந்தன் போன்ற பாராளுமன்ற உறுப்பினர்களை வெருட்டி ரிசாட் பல வேலைகளை செய்திருந்தார்.

தமிழ் தேசியக்கூட்டமைப்பு உறுப்பினர்கள் இது தொடர்பில் கதைக்க மாட்டார்கள். ஒரு குடும்பத்தில் மூன்று பேருக்கு வீடுகள் வழங்கப்பட்டுள்ளது. வயிற்றில் இருக்கும் பிள்ளைக்கும் ரிசாட் பதியுதீன் வீடு கொடுத்துள்ளார்.

காணி இல்லாதவர்களுக்கு காணிகள் வழங்கப்பட வேண்டும். அத்துடன் பேரூந்து நிலையத்திற்கு தீர்வை காணுமாறு ஜனாதிபதி தெரிவித்துள்ளார்.

இந் நிலையில் பல வேலைத் திட்டங்களை மக்களை அலைய விடாமல் செய்ய வேண்டும். அவ்வாறு இணைந்து வேலைத் திடடத்தினை செய்ய அனைவரும் முன்வர வேண்டும்.

அவ்வாறு செய்ய முடியாதவர்கள் எனது தலைமையில் ஒருங்கிணைப்பு குழு இருக்கும் போது அங்கு இருக்க முடியாது என தெரிவித்தார்.

நிகழ்ச்சி நிரலை மீறி தனது கன்னி உரைக்கு அதிக நேரம் எடுத்தமையால் அரச திணைக்கள அதிகாரிகள் அதிருப்தியடைந்தனர்.

இதனை அவதானித்த காதர் மஸ்தான் மற்றும் சிவசக்தி ஆனந்தன் ஆகியோர் நிகழ்ச்சி நிரலில் செயற்படுமாறு முன்னாள் மாகாணசபை உறுப்பினருக்கு ஆலோசனை கூறிய சுவையான சம்பவமும் இடம் பெற்றுள்ளது.